वाळीत टाकल्याप्रकरणी कापीलच्या पोलीस पाटलासह चौघांवर गुन्हा

सत्य सह्याद्री न्यूज नेटवर्क

कराड: कापील, ता. कराड येथील  दोन कुटुंबांना वाळीत टाकल्याप्रकरणी पोलीस पाटील तुषार महादेव ढापरे याच्यासह महादेव विठ्ठल ढापरे, संभाजी शिवाजी ढापरे, किरण श्रीरंग गायकवाड यांच्याविरोधात कराड शहर पोलीस ठाण्यात गुन्हा दाखल झाला आहे. दि. १६ डिसंबेर २०२२ साली घडलेल्या या घटनेबाबत मानवी हक्क आयोगाने निर्देश दिल्यानंतर चौघांविरोधात गुन्हा दाखल करण्यात आला आहे. 

याप्रकरणी ॲड. विनय वसंत दुपटे (वय ३४) यांनी फिर्याद दिली. याबाबत मािहती अशी, विनय हे २००२ साली इयत्ता सातवीत असताना त्यांच्या भावकीतील इसम विलास जोती दुपटे (मयत) व दिनकर भुजाबा दुपटे (मयत) या दोघांमध्ये जागेवरून वाद झाला होता. हा वाद मिटवण्यासाठी विनय यांच्या कुटुंबाने सहभाग घेतला होता. परंतु, सदरचा वाद आवाक्यात न येता तो वाढला आणि  आरोपींपैकी संभाजी शिवाजी ढापरे व किरण श्रीरंग गायकवाड यांनी समाजाची बैठक घेऊन  यशवंत हिंदुराव दुपटे, विलास जोती दुपटे व ॲड. विनय यांचे घर कायमस्वरुपी वाळीत टाकले. 

दि. १६ डिसेंबर २०२२ रोजी दुपटे भावकीतील ॲड विनय यांचे चुलत चुलते पोपट भुजाबा दुपटे यांच्या रक्षा विसर्जनाचा कार्यक्रम कापील येथे होता. त्यावेळी कापील, गोळेश्वर येथील ग्रामस्थ व पाहुणे उपस्थित होते. सर्वजन स्मशानभूमीत जमले असताना  कापील गावचा पोलीस पाटील तुषार ढापरे  व सर्व संशयितांनी ॲड. विनय तेथे आल्याने गोंधळ घातला व या विनयचे घर एवढ्या वर्षांपासून समाजातून वाळीत असताना या मातीच्या कार्यक्रमाला का आलास? त्याला कोणी बोलावले? त्याला जर तुम्ही बोलवत असाल तर आम्ही त्या कुटुंबाच्या कार्यक्रमास येणार नाही, असे म्हणून विनय तेथे जेवल्यामुळे संशयित जेवले नाहीत. 

त्याच रात्री तुषार ढापरे याने विनयचे घर वाळीत असताना त्याला का बोलावता यासाठी समाजाची बैठक बोलावली होती. मात्र, बैठकीस कोणी गेले नाही, असे फिर्यादीत म्हटले आहे. 

याबाबत मानवी हक्क आयोगाकडे तक्रार करण्यात आली होती. आयोगाचे न्या. जोशी यांनी दिलेल्या कराड शहर पोलिसांनी फिर्याद दाखल करून घेण्याचे निर्देश दिले. याबाबतच्या प्रोसिडिंगचा मेल ॲड. विनय यांच्याकडे प्राप्त झाला व नंतर दिलेल्या फिर्यादीवरून गुन्हा नोंदविण्यात आला.