लॉकडाउनची ऐसी तैसी: मुलुंड, सायनमध्ये वाहनांच्या रांगाच रांगा

सत्य सह्याद्री न्यूज नेटवर्क
मुंबई: राज्यातील करोनाचा प्रादुर्भाव वाढत असल्याने राज्य सरकारकडून राज्यात लॉकडाऊन करण्यात आलेला आहे. लोकांनी गर्दी करू नये म्हणून जमावबंदी आदेशही जारी करण्यात आलेले आहेत. सरकारकडून सर्व प्रयत्न सुरू असतानाच मुंबई-पुण्यातील नागरिक मात्र बेपर्वाईने वागताना दिसत आहेत. मुंबई-पुण्यातील लोक आज नेहमीप्रमाणे रस्त्यावर उतरले. त्यामुळे मुंबईत मुलुंड आणि सायन येथे प्रचंड वाहतूक कोंडी झाली होती.
पंतप्रधान नरेंद्र मोदी यांच्या आवाहनानुसार काल संपूर्ण देशात जनता कर्फ्यू पुकारण्यात आला होता. त्याला राज्यातील जनतेने घरातच राहून चांगला प्रतिसाद दिला होता. त्यानंतर राज्यातील करोनाची परिस्थिती हाताबाहेर जाऊ नये म्हणून मुख्यमंत्री उद्धव ठाकरे यांनी जनतेला घरीच बसण्याचं आवाहन करत राज्यात जमाव बंदी आदेश लागू केले. ३१ मार्चपर्यंत जमाव बंदी आदेश लागू केल्याने राज्यातील जनता घरीच बसेल आणि सरकारला सहकार्य करेल असे वाटत असतानाच मुंबई आणि पुण्यात मात्र लोकांची प्रचंड बेपर्वाई दिसून आली.

रेल्वे आणि बसेस बंद असतानाही मुंबईकर नेहमीप्रमाणेच घराबाहेर पडले. अनेक मुंबईकरांनी खासगी वाहने बाहेर काढली आणि कर्जत आणि कसाऱ्याच्या दिशेने निघाले. तर ठाणे-कल्याणमधील लोक मुंबईच्या दिशेने खासगी वाहनांनी निघाले. त्यामुळे मुलुंड येथे सकाळी ९च्या सुमारास प्रचंड वाहतूक कोंडी झाली होती. ही वाहतूक कोंडी दूर व्हावी म्हणून पोलिसांनी मुंबईच्या दिशेने या वाहनांना जाऊ दिले. दहिसर चेक नाक्यावरही मोठ्या प्रमाणावर वाहनांची गर्दी झाली होती. सायन रुग्णालयाजवळही हीच परिस्थिती होती. मुलुंड आणि सायन येथे वाहतूक कोंडीची बातमी पसरल्यानंतर मात्र पोलिसांनी नाकाबंदी करून मुंबई आणि ठाण्याकडे येणाऱ्या जाणाऱ्यांना अटकाव करण्यास सुरुवात केली. नवी मुंबईत ऐरोली टोलनाक्यावरही सकाळी १०च्या सुमारास वाहतुकीची मोठी कोंडी झाली होती. मात्र, पोलीस प्रत्येकाला गाडी थांबवून त्याला घराबाहेर पडण्याचं कारण विचारत होते. योग्य कारण वाटल्यावरच या लोकांना सोडलं जात होतं. मुंबईतील सर्व टोलनाक्यांवरील गर्दी ताबडतोबीने कमी करण्याचे आदेश देण्यात आल्याचं आरोग्यमंत्री राजेश टोपे यांनी सांगितलं.