किरकोळ कारणावरून शेतमजुराचा खून

सातारा जिल्ह्यातील सालपे तालुका फलटण येथील एसटी बस स्टॉप जवळ किरकोळ कारणावरून एकाचा लाकडी दांडक्याने दोघा भावांनी बेदम मारहाण करून शेतमजुराचा खून केल्याने लोणंद परिसरात खळबळ उडाली आहे. यामध्ये लाकडी दांड्याने मारहाण करीत खून करणारे संशयित दोघे भाऊ घटनास्थळावरून फरार झाले असून शोध कार्यासाठी लोणंद पोलिसांचे विविध ठिकाणी पथके रवाना झाली आहेत. यामध्ये बापू संभाजी निकम वय 38 राहणार शेरेचीवाडी असे खून झालेल्या शेत मजुराचे नाव आहे. 
याबाबत लोणंद पोलिस घटनास्थळावरून माहिती अशी की लोणंद पोलीस स्टेशनच्या हद्दीत सालपे गावाच्या हद्दीमधील एसटी स्टॉप जवळ बापू निकम हे काही कामानिमित्त थांबले होते दरम्यान त्याठिकाणी किरकोळ कारणावरून बापू निकम यांचे व सौरभ संजय जगताप गौरव संजय जगताप दोघे राहणार सालपे तालुका फलटण या भावांबरोबर वादावादी झाली. सौरभ जगताप गौरव जगताप यांनी बापू निकम यांना रागातून लाकडी दांडक्याने बेदम मारहाण केली. 
यामध्ये बापू निकम यांच्या वर्मी घाव लागल्याने गंभीर जखमी होत जागीच ठार झाले. यावेळी घटनास्थळावरून सौरभ जगताप व गौरव जगताप या बंधूनी पलायन केले. घटनेचे गांभीर्य लक्षात घेऊन पोलिसांनी त्वरित घटनास्थळी धाव घेतली. यादरम्यान फलटण उपविभागीय पोलिस अधिकारी तानाजी बर्डे यांनी व लोणंद पोलीस स्टेशनचे सहाय्यक पोलीस निरीक्षक विशाल वायकर पोलीस अंमलदार महेश सपकाळ लोणंद पोलिसांनी घटनास्थळी भेट दिली. 
यावेळी मृत बापू निकम यांचा मृत्यू देह शवविच्छेदन लोणंद येथील प्राथमिक आरोग्य केंद्रात करीत मृतदेह नातेवाईकांच्या ताब्यात देण्यात आला आहे. या घटनेची नोंद लोणंद पोलीस स्टेशनला झाली आहे. या घटनेचा अधिक तपास पोलीस अधीक्षक विजयकुमार बंसल अप्पर पोलीस अधीक्षक अजित बोर्‍हाडे फलटण पोलीस उपविभागीय अधिकारी तानाजी बरडे यांच्या मार्गदर्शनाखाली सहाय्यक पोलिस निरीक्षक विशाल वायकर करीत आहे.