पेट्रोल-डिझेलच्या वाढलेल्या किंमतींवरून गेल्या काही दिवसांपासून टीकेचे धनी व्हावे लागलेल्या मोदी सरकारने आज अखेर पेट्रोल-डिझेलच्या किमतीत कपात करण्याचे पाऊल उचलले आहे. अर्थ मंत्रालयाने आज (मंगळवार) संध्याकाळी एका ट्विटद्वारे ही माहिती दिली आहे. त्यानुसार पेट्रोल-डिझेलवरील अबकारी शुल्क (बेसिक एक्साइज ड्यूटी) प्रतिलीटर २ रुपयांनी कमी करण्यात आले आहे. बेसिक एक्साईज ड्यूटीमधील ही कपात ब्रँडेड आणि नॉनब्रँडेड दोन्ही प्रकारच्या पेट्रोल-डिझेलला लागू होणार आहे.
अर्थ मंत्रालयाने आपल्या ट्विटमध्ये म्हटले आहे की, कपातीचा हा आदेश ४ ऑक्टोबरपासून लागू करण्यात येत आहे. आंतरराष्ट्रीय बाजारात क्रूड तेलाच्या वाढच्या किमतीच्या प्रभावामुळे देशात पेट्रोल-डिझेलच्या किमतींत होणारी वाढ रोखण्यासाठी हे पाऊल उचलले गेल्याचे अर्थ मंत्रालयाचे म्हणणे आहे.
अबकारी शुल्कात करण्यात आलेल्या या कपातीमुळे सरकारला महसुलात वर्षाला २६ हजार कोटी रुपयांचे नुकसान होणार असल्याचे अर्थ मंत्रालयाने ट्विटद्वारे स्पष्ट केले आहे. या वर्षातील उर्वरीत महिन्यांमध्ये हे नुकसान १३ हजार कोटी रुपये होईल असा अंदाज व्यक्त करण्यात येत आहे. मात्र, सर्वसामान्य नागरिकांना दिलासा देण्यासाठीच हा निर्णय घेतला गेल्याचे मंत्रालयाचे म्हणणे आहे.
तेलाच्या वाढत्या किंमतीच्या मुद्यावरून विरोधकांनीही गेल्या अनेक दिवसांपासून सरकारवर टीकेची झोड उठवली आहे.
0 Comments