केवळ भाषा नव्हे ,भावनाही चांगली हवी- प्रा सुभाष वाघमारे

लोणंद@ सत्य सह्याद्री न्यूज नेटवर्क 

जगातल्या सर्व भावनिक व ज्ञान व्यवहाराचे भाषा हे एकमेव माध्यम आहे त्यामुळे भाषिक विकास हा माणसाच्या व्यक्तिमत्वास अपरिहार्य आहे पण नुसती भाषा चांगली असून चालत नाही ,भावनाही चांगली असली तर सामाजिक जडणघडण चांगली होत,असे मत शरदचंद्र पवार महाविद्यालयातील मराठी विभागप्रमुख प्रा सुभाष वाघमारे यांनी व्यक्त केले ,ते तोंडल येथे शिरवळच्या श्रीपतराव कदम महाविद्यालयाने आयोजित केलेल्या राष्ट्रीय सेवा योजनेच्या विशेष हिवाळी श्रम संस्कार शिबिरात बोलत होते अध्यक्ष स्थानी प्रा डॉ देवकी राठोड या उपस्थित होत्या 

भावना, विचार कल्पना ,ज्ञान व अनुभव व्यक्त करण्यासाठी भाषेचा उपयोग केला जातो हे सांगून पुढे ते म्हणाले की ,"प्रत्येकाने श्रवण, भाषण ,लेखन, वाचन या भाषिक कौशल्ये विकसित केली पाहिजेत ,मेंदूत शब्दसंग्रह साठा वाढविला पाहिजे ,त्यासाठी मानवी भाषेचे सूक्ष्म निरीक्षण करून शब्द मिळवावेत व उत्तमोत्तम विविध क्षेत्रातील ग्रंथ वाचून शब्दासह ज्ञान आत्मसात करावे. 

भाषेचा उपयोग विचारपूर्वक केला पाहिजे ,विध्वंस करण्यासाठी नव्हे विधायक मानवी कल्याणासाठी केला पाहिजे, शब्द हे दुधारी शस्त्र असून सर्वांचे कल्याणासाठी शुद्ध हेतूने ते वापरले पाहिजे, साहित्य माणसाचे जीवन तर सांगतेच पण मनही उद्दात करते ,पाव किलो मटण कमी खा पण त्याच पैशाने एक तरी वर्तमानपत्र रोज घरी वाचा असे आवाहन त्यांनी विद्यार्थ्यांना केले ,एन एस एस च्या मुलांनी कोणत्याही एका धर्माचे राष्ट्र उभे रहावे यासाठी काम करू नये तर आपली देशाच्या बहुविध संस्कृतीचा वारसा समजून ,भारतीय संविधानानुसार आचरण करीत  भारतीयत्व हेच राष्ट्रीयत्व हा संदेश पोहचवा ,असे ते म्हणाले ,मुला मुलींनी आपल्या जातीचेच केवळ मित्र न करता विविध जाती धर्म देशातील मुलांशी मैत्री करावी असेही ते म्हणाले 

अध्यक्षीय भाषणात प्रा देवकी राठोड म्हणाल्या की शब्द जपून वापरावेत ,स्वल्पविराम सुद्धा कुठे द्यायचा याचे भान ठेवावे अन्यथा अनर्थ घडतो

प्रारंभी प्रास्ताविक मोहित अंतूरकर यांनी केले   ,आभार कु.प्रतिक्षा टापरे हिने मानले कु .वृषाली भोसले हिने सूत्र संचालन केले  या कार्यक्रमास कार्यक्रम अधिकारी प्रा अनंत सोनवणे ,प्रा डॉ शरद पवार ,प्रा तानाजी देवकुळे ,प्रा राजकुमार मरे ,व एन एस एस चे विद्यार्थी व ग्रामस्थ उपस्थित होते