हिम्मत असेल तर कारखान्याचे मालक कोण, हे जाहीर करा: सोमय्या

जरंडेश्वर कारखान्यावर  किरीट सोमय्या यांना घातला घेराव

सातारा

जिल्ह्यातील जरंडेश्वर साखर कारखान्यावर भाजप नेते किरीट सोमय्या आल्यानंतर राष्ट्रवादी कार्यकर्ते व कारखाना शेतकरी सभासदांनी त्यांना घेराव घातला. यामुळे काही काळ तणावाचे वातावरण निर्माण झाले. दरम्यान, उपमुख्यमंत्री अजित पवार यांनी हिम्मत असेल तर कारखान्याचे मालक कोण? हे जाहीर करावे, असे आव्हान सोमय्या यांनी दिले.बुधवारी सकाळी पाऊणे दहा वाजता जरंडेश्वर कारखान्यावर किरीट सोमय्या भाजप कार्यकर्त्यांसोबत पोहोचले. यावेळी कारखान्यावर कार्यकर्त्यांनी घोषणा दिल्या. सुरुवातीला जरंडेश्वर सहकारी साखर कारखान्याच्या सभासद व पदाधिकारी यांनी अजित पवार यांच्याबाबत तीव्र भावना व्यक्त केल्या. कारखाना चुकीच्या पद्धतीने लिलाव केला असल्याचा आरोप त्यांनी केला. यावेळी सोमय्या यांनी त्यांच्या भावना ऐकून घेऊन कारखाना मूळ सभासद यांचा होण्यासाठी प्रयत्न करणार असल्याची ग्वाही त्यांनी दिली.दरम्यान, दुसऱ्या बाजूला थांबलेले पाच, सहा राष्ट्रवादी कार्यकर्ते व शेतकरी तेथे आले. त्यांनी सोमय्या यांना घेराव घालत कारखाना सुस्थितीत सुरू आहे. आपल्या अशा पवित्र्याने कारखाना बंद पडेल. शेतकरी, कामगार देशोधडीला लागेल असे म्हणत जाब विचारला. यामुळे वातावरण तापले. सोमय्या यांनी त्यांचीही बाजू ऐकून खुलासा की, कारखाना सुरूच राहिला पाहिजे. शेतकरी व कामगार यांचे हित सुरूच राहिले पाहिजे. आपला लढा केवळ चुकीच्या पद्धतीने लिलाव झाल्या विरुद्ध आहे. कारखाना मूळ सभासदांना मिळाला पाहिजे. याबाबत उच्च न्यायालयाने लिलाव प्रक्रियेबाबत आदेश दिले असल्याचे त्यांनी सांगितले.यावेळी कारखान्याचे उपाध्यक्ष शंकरराव भोसले, दत्तात्रय धुमाळ, प्रकाश आबा फाळके, अविनाश फाळके, भगवान फाळके, लिला जाधव, किसनराव घाडगे यांनी जरंडेश्वर कारखाना सभासदांच्या मालकीचा व्हावा, यासाठी प्रयत्न करण्याची विनंती श्री. सोमय्या यांना केली. या सर्वांचे म्हणणे ऐकून घेतल्यानंतर श्री.सोमय्या म्हणाले, "या कारखान्याच्या संस्थापक, संचालकांनी माझी तीन वेळा भेट घेतली आहे. त्यांच्या विनंतीवरुन त्यांच्या व्यथा ऐकण्यासाठी मी येथे आलो आहे. बेनामी पद्धतीने हा कारखाना घेतला आहे. त्याचा मालक कोण? याची कथा तयार केली, तर पिक्चर तयार होईल. यापूर्वी केंद्रात, राज्यात तुमची सत्ता होती. आजारी कारखान्यांना मदत करणे तुमचे काम होते. मग हा कारखाना बंद कसा पडला? आता न्यायालयाच्या आदेशाने या कारखान्याची चौकशी सुरू आहे. 

जरंडेश्वरसह पाच कारखान्यांची माहिती मी घेत आहे. 'जरंडेश्वर' सहकारी होता, आता जरंडेश्वर शुगर प्रायव्हेट लिमिटेड झाला आहे. हा शेतकऱ्यांचाच कारखाना आहे, असे वाटावे, म्हणून नावामध्ये जरंडेश्वर शब्द ठेवला आहे. सामान्यांना कर्ज मिळवताना त्यांच्या सात पिढ्या जातात, तुम्हाला सात तासांमध्ये ८५ कोटींचे कर्ज कसे मिळाले? लवकरच हा घोटाळा समोर येणार आहे. मी पाच टप्प्यांत माहिती घेण्याचा प्रयत्न केला, पण अद्याप मूळ मालक सापडला नाही. गुरू कमोडिटीचा मालक सध्या जेलमध्ये आहे.गुरू कमोडिटीची बेनामी सिद्ध झाली, तशी पवार परिवाराचीही सिद्ध होणार आहे. शेतकरी राजाच बेनाम झाला आहे." किसन वीर सातारा सहकारी साखर कारखान्याच्या एक हजार कोटींच्या कर्जाविषयीच्या प्रश्नावर आणि 'सोमय्या यांना जरंडेश्वर दिसतोय, किसन वीर कारखाना दिसत नाही', या अजित पवार यांच्या वक्तव्यासंदर्भात 'आता अजित पवार यांची नजर किसन वीर कारखान्यावर गेली आहे का? असा प्रतिप्रश्न करत श्री. सोमय्या यांनी थेट बोलणे टाळून कोणत्याही कारखान्यासंदर्भात पुरावे दिल्यास पक्ष न पाहता मी तेथे जाईन, असे सांगितले. दरम्यान, कारखाना व्यवस्थापनाने श्री. सोमय्या यांच्या स्वागताची तयारी केली होती, प्रवेशद्वाराच्या आत अधिकारी पुष्पगुच्छ घेऊन थांबले होते; परंतु सोमय्या यांनी प्रवेशद्वाराबाहेरच तेथे जमलेल्या उपस्थितांशी संवाद साधून ते निघून गेले.जरंडेश्वर साखर कारखाना विक्री घोटाळाप्रकरणी माहिती घेण्यासाठी व शेतकऱ्यांशी संवाद साधण्यासाठी भाजपचे नेते माजी खासदार किरीट सोमय्या यांचे आज पहाटे साताऱ्यात आगमन झाले. सकाळी ते कारखान्यावर येणार असल्याने संपूर्ण कोरेगाव शहर व कारखान्यावर पोलिसांचा चोख बंदोबस्त ठेवण्यात आला होता. पहाटे ३ वाजता किरीट सोमय्या साताऱ्यात आल्यानंतर ते शासकीय विश्रामगृहात मुक्कामी थांबले. सकाळी कार्यकर्त्यांना भेटल्यावर कोरेगाव मध्ये १०.३० वाजता आल्यावर स्थानिक भाजप कार्यकर्त्यांनी त्यांचे स्वागत केले. ११ वाजता जरंडेश्वर कारखान्याकडे रवाना झाले. दरम्यान, कायदा व सुव्यवस्था अबाधित ठेवण्यासाठी सातारा पोलिस चौकाचौकात थांबून होते.