ऊस ट्रॉलीने घेतला गोगावलेवाडीच्या युवकाचा बळी

सत्य सह्याद्री न्यूज नेटवर्क
मेढा:  केंजळनजीक रस्त्यावर उभ्या असलेल्या ट्रॅक्टर ट्रॉलीला मागून दुचाकी धडकल्याने गोगलेवाडी येथील युवक जागीच ठार झाला. हा अपघात  गुरुवारी सायंकाळी झाला.  
या अपघाताची बातमी कळताच गोगावलेवाडी ग्रामस्थांनी अपघातस्थळी गर्दी करून गदारोळ केल्याने काहीकाळ तणावाचे वातावरण निर्माण झाले होते.घटनास्थळावरून मिळालेल्या माहितीनुसार, गोगावलेवाडी, ता. सातारा येथील युवक शैलेश बाळाराम गोगावले (वय 23) हा गुरुवारी सायंकाळी 7 वाजण्याच्या सुमारास मेढयाहून आपल्या गावाकडे होळीसाठी येत होता.
या दरम्यान केंजळ नजीक असलेल्या सातारा-मेढा रस्त्यावर उभ्या असलेल्या ट्रॅक्टर ट्रॉलीला   त्याच्या दुचाकीने पाठीमागून जोरदार धडक दिली. ही धडक इतकी जोरदार होती की,  तो दुचाकीसह ट्रॉलीच्या उसात जाउन अडकला.या भीषण अपघातात शैलेश जागीच ठार झाला. रात्री उशीर झाला तरी शैलेश घरी आला नसल्याने कुटुंबियांनी त्यांच्या मोबाईलवर फोन केला असता, त्यांना अपघाताची माहिती कळाली. अपघाताची माहिती मिळताच कुटुंबियांसह ग्रामस्थांनी अपघातस्थळी गर्दी करून ट्रॅक्टर मालकास आमच्या हवाली करा, असे म्हणत गदारोळ केला.
यामुळे काहीकाळ तणावाचे वातावरण निर्माण झाले होते. या अपघाताची नोंद मेढा पोलीस ठाण्यात दाखल झाली असून, याचा अधिक तपास पोलीस करत आहेत.
घटनेने शोककळा
घटनास्थळाचा पंचनामा करून मृतदेहाचे गुरुवारी रात्री उशिरा पोस्टमॉर्टेम करण्यात आले. शैलेश गोगावले याने विज्ञान शाखेतून नुकतीच पदवी मिळवली होती. तो नोकरीचा शोध करीत आपल्या वडिलांसमवेत ट्रॅक्टर व मळणी यंत्राच्या साह्याने शेती व्यवसाय करीत होता. शैलेशचे वडील बाळाराम यांचा स्वतःचा टॅक्टर, भरडी मशीन असलेने ते मेढा केळघर विभागात परिचयाचे आहेत परंतु एकुलता एक मुलगा वृदापकाळाचा आधारच हरपले मुळे त्याचेवर आभाळ कोसळले आहे.  या घटनेने गोगावलेवाडी परिसरावर शोककळा पसरली होती. अचानक झालेल्या अपघातात एकुलता एक मुलगा गेल्याने त्यांच्या कुटुंबीयांना मोठा धक्का बसला आहे. शैलेशच्या मागे आई-वडील व एक विवाहित बहीण असा परिवार आहे.
ऊस वाहतूक करणार्‍या अनेक ट्रॅक्टरला कोणतेही रिफ्लेक्टर नाहीत. धोकादायक स्थितीत वाहतूक केली जाते. याकडे संंबंधित खात्याचे पूर्णपणे दुर्लक्ष होत असून याची दखल घेतली नाही तर तीव्र आंदोलन छेडण्याचा इशारा व्यसनमुक्त युवक संघाकडून देण्यात आला आहे.