दहिवडीत चेक बाउन्स प्रकरणी दोन वर्षाचा कारावास

पाच हजाराचा दंड, प्रियदर्शनी पतसंस्थेला पाच लाखाची नुकसान भरपाई

दहिवडी / प्रतिनिधी

दहिवडी ता. माण येथिल प्रियदर्शनी पतसंस्थेच्या कर्ज प्रकरणातील परत फेडीसाठी आशिष गांधी यांनी दिलेला पाच लाखाचा धनादेश वटला नाही. याप्रकरणी पतसंस्थेने दहिवडी न्यायालयात गांधी यांच्या विरोधात फसवणुकीची केस दाखल केली होती , या केसचा नुकताच निकाल लागला असून दहिवडी न्यायालयाचे न्यायाधीश अमितसिंह मोहने यांनी संस्थेच्या फसवणूक व चेक बाउन्स प्रकरणी आशिष गांधी यांना दोन वर्षाचा कारावास व पाच हजाराचा दंड ठोठावला आहे.

मिळालेली माहिती अशी, दहिवडी ता. माण येथील प्रियदर्शनी ग्रामीण बिगरशेती सहकारी पतसंस्था मर्या.दहिवडी या संस्थेचे आशिष गांधी यांनी व्यवसायासाठी कर्ज घेतले होते. या कर्जाच्या परतफेडीसाठी बँक ऑफ इंडीया शाखा दहिवडी या बँकेचा पाच लाखाचा धनादेश दिला होता.

पाच लाख रुपयांचा हा धनादेश गांधी यांच्या खात्यावर रक्कम नसल्याने वटला नाही व तो धनादेश (चेक) बाउन्स झाला होता. या प्रकरणात प्रियदर्शनी पतसंस्थेने आशिष गांधी यांना कायदेशीर नोटीस दिली होती. या नोटीसाला  कोणतेही उत्तर देण्यात आले नाही.त्यानंतर याप्रकरणी पतसंस्थेने दहिवडी न्यायालयात गांधी यांच्या विरोधात चेक बाउन्स व  फसवणुकीची एनआय अक्ट १३८ नुसार फौजदारी  केस दाखल केली होती. या केसचा नुकताच निकाल दहिवडी न्यायालयाचे न्यायाधीश अमितसिंह मोहने यांनी दिला आहे. यामध्ये चेक बाउन्स प्रकरणी आशिष गांधी यांना दोन वर्षाचा कारावास व पाच हजाराचा दंड ठोठावला आहे. तसेच नुकसान भरपाई म्हणून पतसंस्थेला पाच लाख रुपये गांधी यांनी भरणेचे आहेत. ही रक्कम भरली नाहीतर आणखी चार महिने अधिक शिक्षा करण्याचा आदेश करण्यात आला आहे. प्रियदर्शनी पत संस्थेच्या वतीने अॅड. विजयकुमार काळे यांनी काम पाहिले.